بازرگانیی ئێران و هەرێمی کوردستان

تیجارەت بان، ئەحمەد وەحیدی، وەزیری ناوخۆی ئێران دوای تەواوبوونی کۆبوونەوەی ناوەندی باڵای بەرەنگاربوونەوەی کۆرۆنای ئێران رایگەیاند، بڕیاری سنووردارکردنی گەشتکردن لە وڵاتانی دراوسێوە هەڵوەشاوەتەوە و هاووڵاتییانی وڵاتانی دەوروبەری ئێران دەتوانن سەردانی ئەو وڵاتە بکەن.

 
وەزیری ناوخۆی ئێران دەڵێت، لە سنوورە وشکانییەکان رێگە بەو کەسانە دەدرێت بچنە ئەو وڵاتە، کە پێکوتەی کۆرۆنایان وەرگرتبێت و بەڵگەنامەی نێگەتیڤبوونی تێستی کۆرۆنایان پێبێت.

 
لەبارەی وڵاتانی دیکە، ئەحمەد وەحیدی دەڵێت، قەدەخەکردنی گەشتکردن لە وڵاتانی ئەوروپا وەکو فەرەنسا و بەریتانیا بەردەوام دەبێت، بەڵام رێگە دەدرێت هاووڵاتییانی ئەو وڵاتانەی توانیویانە بڵاوبوونەوەی کۆرۆنا کۆنترۆڵ بکەن، لە رێگەی ئاسمانییەوە بچنە ئەو وڵاتە.

 
رۆژی 23-12-2021 ئیسماعیل عەلی، گوتەبێژی دەروازەی نێودەوڵەتیی باشماخ، بەتۆڕی میدیایی رووداوی گوت: "بەپێی راگەیێندراوێکی کۆنسوڵخانەی ئێران، لە رۆژی شەممە 25ی کانوونی یەکەمی 2021 و بۆ ماوەی دوو هەفتە پێدانی ڤیزەی گەشتیاری بە هاونیشتمانیانی هەرێمی کوردستان و هاووڵاتیانی عێراق رادەگیرێت. دوای بەدواداچوونی ئێمە، لایەنی ئێرانی پێیانگوتووین کە وەکو رێوشوێنێکی خۆپارێزییە لە بڵاوبوونەوەی گۆڕاوی جۆری ئۆمیکرۆنی ڤایرۆسی کۆرۆنا و ئەو بڕیارە بەسەر هەموو دەروازە سنوورییەکان و گەشتە ئاسمانییەکان جێبەجێ دەبێت."/رووداو