بازرگانیی ئێران و هەرێمی کوردستان

تیجارت بان، بەگوێرەى نووسراوێکى دەزگاى ناوەندى پۆلێن و کۆاڵێتى کۆنتڕۆڵى عێراق، کە 20ى نیسانى 2022 دەرکراوە قەدەخەى هاوردەکردن لەسەر 12 ماددەى خۆراکى لادراوە، لەوانەش بیرە، هێلکە و مریشک.

 حەمید نایف، گوتەبێژى وەزارەتى کشتوکاڵى عێراق بە تۆڕى میدیایی رووداوى راگەیاند، ئەو بڕیارە پەیوەستە بە هاوردەکردن لە رێگەى دەروازە سنوورییەکانەوە، بە دەروازە سنوورییەکانى هەرێمى کوردستانیشەوە، نەک لە هاوردەکردنى نێوخۆیی لەنێوان هەرێمى کوردستان و ناوچەکانى دیکەى ناوەند و باشوورى عێراق، کە بەگوێرەى پێوەرى شکنینى تەندروستى دەبن.

گوتەبێژى وەزارەتى کشتوکاڵى عێراق گوتى: "ئەو هەنگاوە کۆنە و بەپشتبەستن بووە بە بڕیارەکانى ئەنجوومەنى وەزیران. هەر بەگوێرەى ئەو بڕیارە دەتوانرێت بەرهەمى نێوخۆیی هەرێمى کوردستان هەناردەى ناوچەکانى دیکەى عێراق بکرێت و بەرهەمى نێوخۆیی هەرێمى لە بڕیارەکەى ئەنجوومەنى وەزیران بەدەرکراوە".

رۆژی 8ى ئادارى 2022 ئەنجوومەنى وەزیرانى عێراق بڕیاری دا بۆ ماوەى دوو مانگ قەدەخەى هاوردەکردن لەسەر چەندین ماددەى خۆراکى هەڵبگرێت، کە پێشتر بۆ پاراستنى بەرهەمى نێوخۆیی قەدەخە بوو هاوردە بکرێن، هەروەها بڕیاریدا گومرگى سەر خۆراک و کەرەستەى بیناسازی بۆ ماوەى دوو مانگ هەڵبگرێت.