بازرگانیی ئێران و هەرێمی کوردستان

تیجارەت ‌بان: رۆحوڵا لەتیفی گوتەبێژی گومرگی ئێران ئاماژەی داوە، لە دوای چین، زۆرترین هەناردەی ئێران بۆ عێراق، توركیا، ئیمارات و ئەفغانستان بووە.

ئێران لە ماوەی حەوت مانگدا 99 ملیۆن تۆن كاڵا و شتومەكی بە بەهای 55 ملیار دۆلار بۆ وڵاتانی دنیا ئاڵوگۆڕ كردووە. 142 وڵات بەشێوەیەكی راستەوخۆ شتیان لە ئێران كڕیوە و 110 وڵاتیش هەناردەیان بۆ ئێران هەبووە.

قەبارەی هەناردەی ئێران لە حەوت مانگی رابردوودا 27 ملیار و 74 ملیۆن دۆلار بووە، چین بە حەوت ملیار و 689 ملیۆن دۆلار، عێراق بە پێنج ملیار و 483 ملیۆن دۆلار، توركیا بە سێ ملیار و 397 ملیۆن دۆلار، ئیمارات بە دوو ملیار و 590 ملیۆن دۆلار و ئەفغانستان بە ملیارێك و 126 ملیۆن دۆلار، پێنج وڵاتن كە ئێران زۆرترین هەناردەی بۆیان هەبووە.

لەو 142 وڵاتەی ئێران ئاماژەی بە ناوەكانی كردووە و بە قسەی خۆی هەناردەی بۆیان هەبووە، ناوی كۆمەڵێك وڵات هەن كە لە خوارووی 10 هەزار دۆلاریان بۆ هەناردە كراوە. بۆ نموونە بە بەهای شەش هەزار و 500 دۆلار هەناردەی ئێكوادۆر كراوە و سەرووی حەوت هەزار و 500 دۆلاریش هەناردەی نیكاراگوا كراوە.